تاج بطعم الفانيليا

الأستاذة جنى الله يسامحها بعتتلي تاج ولما رحت لقيت فرح أنا مش قده ... أسئلة يمين و شمال و هات يا ضرب من كل ناحية، الصراحة أنا هاحمرأ وأذكر ست نقاط عني ما بين معلومات و بين أسرار ومش هباصي لحد عشان أنا مش باحب الأذية. و ربنا يسامحك ياللي في بالي.

1- أنا دماغي ما بتبطلش وش ... الموتور مش بيفصل خالص .. حتى لما باقوله افصل دي التلاجة بتفصل مش بيرضى و بيعمل مش واخد باله ... وده معذبني لأن كتير من الوش ده عالفاضي فا مش بينوبني غير حرق البنزين وبس ... آخر ما زهقت أنا رجعت أحطله بنزين 80 تاني لأن بنزين 90 بقى ب 175 قرش و أنا جيبي مخروم بطبيعته يعيش بنزين 80 يا يعيش.

2- باخد بالي من الحاجات الصغيرة اللي ماحدش بياخد باله منها .. وده طبعاً بيعمللي مشاكل كتير .. خصوصاً مع البنات " العائلة و الزميلات" بلاش ابتسامة الإنتصار اللي شايفها دي.

بحاول كتير اغير من النقطة دي أو حتى أخففها شوية لكن مشكلتي إن جهاز التحليل الطيفي ... أقصد الآدمي عندي على طول بيشتغل و يحط الضحية تحت المنظار الطيفي و يبدأ التحليل و الملاحظة. حاجة مستفزة أنا عارف.

3- أنا عبارة عن زهايمر يمشي على قدمين ... و مهما حد قاللي الحال من بعضه هطالبه بالتنحي وقتياً لأن المفاجأة ان الحال وصل بيا مرة إني نسيت أخويا شقيقي !!!

ده كان الموجز ... دلوقتي الأنباء بالتفصيل، كان الكمبيوتر من فترة طويلة مر بحالة متعسرة والبوردة طلعت معاش وأخويا كان عنده بحث للجامعة و لازم يتعمل على كمبيوتر ... استلفت كمبيوتر صاحب عمري عشان أخويا يخلص عليه بحثه وقعدت ظبطت فيه حاجات كتير عشان يمشي زي ما أنا عايز وعشان يلائم احتياج أخويا باللي هو متعود يلاقيه في جهازنا.

لحد كده الكلام حلو ... اللي مش حلو جاي أهو .. ماحدش يستعجل، بعد ما أخويا خلص البحث بتاعه أنا رجعت الكمبيوتر لصاحبي و في مرة كنت أنا و صاحبي و أخوه بنتكلم و جت سيرة الكمبيوتر بشكل عام وصاحبي قاللي الجهاز من ساعة ما رجع من عند عبد الرحمن و هو تمام ... شوية و اتكلمنا عن حاجة تانية وقاللي بصراحة عبده رجع الجهاز زي الفل وسرع و فيه كل حاجه .. و كل شوية يقوللي عبد الرحمن عبد الرحمن ... و أنا فعلاً كنت نسيت كل حاجة عن الموضوع ده، فسألته ببراءة شديدة: هو مين عبد الرحمن ده اللي انت كل شوية عمال تجيب سيرته ... اللي يشوفك و انت عمال تقوللي اسمه كده يقول اني أعرفه. وطبعاً مش هاكملكم ايه اللي حصل.

4- أنا كائن غير اجتماعي مطلقاً ... باحب الناس ونفسي أبقى معاهم .. بس دايماً بارجع في آخر لحظة .. دايماً متهم إني غريب و معقد الدنيا و باكبر المواضيع و تفكيري غريب و غير معتاد، عشان كده باقصر تعاملي عالناس اللي قدرت تتعامل معايا.

5- أنا دايماً متهم إني حساس في التعامل ومش مرن و متمسك برأيي ... بحاول حالياً اهدي نقطة التعصب للرأي و أعتقد إني نجحت لحد مش بطال ... أما الحساسية فمش قادر .. صعب قوي .. بس آديني بكافح.

6- الحمد لله .. هاتخلص قبل ما اتفضح أكتر من كده. أنا حالم و أعيش بأخلاقيات و مثل و طباع لا تنتمي لهذا العصر لهذا فأنا أصنف ضمن فئة الحالمين المنقرضين و موطني الأصلي سيبريا لأني باموت في الهوا و الطراوة و باكره الحر و الرطوبة جداً خصوصاً إني عايش فيهم على طول.

7- مش عارف ليه عايز أرغي كمان ... الله يجازي اللي كان السبب، أنا باعشق القهوة .. باحبها جداً وبادوب في طعمها ... خصوصاً لما التحويجة تكون مظبوطة .. لما بانزل وسط البلد و أعدي على عبد المعبود و أشوف المطحنة و أنواع البن المرصصة قدامه بابقى هايغمن عليا، بس للأسف باستعملها هي و النسكافية كأدوات مهدئة ومساعدة على النوم ... وطبعاً ده يجرنا للحديث إني عصبي و خلقي ضيق ... يادي الفضايح.

8- أنا ذواق في الأكل وأمي ربنا يخليها بتفكر تجيبلي دكتور يفصل سلكتين الشم و التذوق من عندي عشان ترتاح ... مع إن نفسها في الأكل يجنن ... بس لما الموضوع يوصل إني أحس بطعم الفلفل الأخضر اللي اتحط في طبق الجبنة البيضا و هو سليم شوية وبعدين اتشال وألاقي أنا طعمه في حتة جبنة بيضا من اللي كانت في الطبق. أو أحلل مكونات الأكلة أو الشوربة.. أو أعرف الشاي تقيل ولا خفيف و سكره قليل ولا زيادة ولا مظبوط من ريحته يبقى أكيد هاتساعدوا أمي في موضوع الدكتور ده.

9- أنا باحب القراءة جداً وبعدت عنها كتير بسبب الكمبيوتر بس بحاول أرجع تاني دلوقتي عشان حاسس إني بقيت فاضي .. وأنا من الناس اللي بطارياتها بتتشحن بالقراءة.

10- البحر هو المكان الوحيد اللي باحس إني بانتمي ليه ... لما بانزل البحر بالليل و خاصة لو لوحدي ولما ادخل للغويط وما ألاقيش أرض تحتي باحس إني رجعت بيتنا، ساعات باقعد قدامه بالساعات وفي عز الشتا و السما تمطر عليا مرتين وتلاتة ... بس بابقى منتعش و حاسس إني كنت باغسل نفسي من كل حاجة.

11- الكلمة الطيبة صدقة ... معنى كبير قوي في حياتي لأن الكلمة عندي ليها قدر كبير من الأهمية و تأثيرها عليا ضخم جداً ... و عشان كده بحاول دايماً إني أدي كل واحد حقه و خاصة في الثناء و الشكر لأني عارف قد ايه الحاجات البسيطة دي بتفرق مع نفسية الإنسان.

12- آخر كلام هاقوله عشان كده يا دوب على قد فلوسكم ... أنا محتاج كمال الجنزوري ييجي يخططلي حياتي .. ماهو خطط لمصر 22 سنة ولما بدأ يصلح فيها شالوه ... بس أنا هاسيبه و هابوس إيده عشان يخطط عندي زي ماهو عايز .. أنا واثق في الراجل ده .. ومحتاجه.

شكراً للأخت الفاضلة جنى على التدبيسة دي و نردهالها في يوم ان شاء الله. بس أنا مش هاعذب حد تاني وهاكتفي بإني أكون آخر الرجال المعذبين.