موبايل أحمد شفيق يرن: يا ريس ... رد يا ريس ...
شفيق: آلوووووووووووو ...
صوت غير معروف: مساء الخير يا مون بيه ....
شفيق: مساء النور .. مين معايا؟؟
صوت غير معروف: أنا مبعوث العناية المشيرية ....
شفيق: طب و العناية المشيرية نفسها فين؟؟
مبعوث العناية المشيرية: في فترة صمت انتخابي و تأمل رئاسي ... و استقراء أحداث.
شفيق: إبليس يكون في العون ... خير؟؟
المبعوث: يعني بصراحة هيا عدالة العسكر نزلت على استاد القاهرة
شفيق: إزاي؟؟
المبعوث: اكتشفنا كام ألف صوت ضالين فهديناهم ...
شفيق: و دول كام صوت؟؟
المبعوث: عايزهم كام؟؟
شفيق: البركة في القليل .... أنا مش طماع، بس انت عارف دلوقتي ما عادش ينفع من الجولة الأولى .. بس طبعاً ما ينفعش أبقى ريس و أنا التاني في عدد الأصوات.
المبعوث: غالي و الطلب رخيص تحب تفرق بكام صوت؟؟
شفيق: يعني أنا متأخر عن المخفي بحوالي 200 ألف صوت نحط عليهم 200 زيهم و بارك الله فيما رزق ...
المبعوث: 400 ألف صوت مرة واحدة !!!! وسعت منك شوية دي يا سيادة الفريق.
شفيق: ايه؟؟
المبعوث: لازم تبقى محبوكة و الفارق ما يبقاش كبير عشان الناس تقتنع إنها نتيجة طبيعية ...
شفيق: طب خلاص ... أمري لله ... خليهم فارق 160 ألف صوت بس.
المبعوث: طول عمر ظننا فيك ما يخيبش يا فندم ... متواضع و راضي بقليلك طول عمرك .... ان شاء الله منصور ...
شفيق: منصور ايه بس .... لأ الناجي ...
المبعوث: ايه؟؟
شفيق: الناجي ... شفيق الناجي.
المبعوث: وجبت يا فندم .... النشيد الوطني الجديد هايكون: شفيق الناجي اسم الله عليه اسم الله عليه.
شفيق: و العلم عايز ي ......
المبعوث: من غير ما تقول يا فندم .... هايتم تغيير النسر بصورة حضرتك .... و لو حد اتكلم فأنت نسر برضه ... نسر السما و الأرض.
شفيق: ميرسي ليك ....
المبعوث: اشكر العناية يا فندم.
شفيق: قطيعة ..... ماحدش بياكلها بالساهل.
من وحي آخر نكتة .....
أنا حاجز زنزانة بحري في سجن العقرب من دلوقتي ... بس يا رب السرير يبقى علوي عشان النفس.
عمر الطحان.
